Det byrja i kjellaren i Pål-garden på Langlo på Stranda, og dei kalla det Møbeleventyret. Hendige gutungar med dristige draumar var starten på det som skulle bli ei nyskapande og innbringande møbelklynge på Sunnmøre.
To tiår seinare var fabrikken den største korgmøbelfabrikken i Skandinavia. Peter Iversen Langlo viste veg i eit samfunn utan industri-tradisjon, utan kapital, utan fagutdanna medarbeidarar. Han skapte industri utan fagfolk og industri-kultur på ein stad der vegen både til råvarer og marknad var lang og krunglete.
Trass i konkurranse frå billig-land: 110 år etter gror det framleis i fotspora hans. Dette er historia om sunnmøringane som møblerte landet. No står kampen om den internasjonale marknaden. Kan ferdigvareindustri som møbel ha ei framtid i det som blir kalla verdas rikaste land?
