Boka fortel historia om Selje prestegard med vekt på dei siste 200 åra. Prestegardstunet inst i Seljevågen, med seks freda bygningar, er ei perle, som framleis er prestebustad. Her har kjende prestar budd, m.a. "potetpresten" Peder Harboe Frimann. Sonen, diktarpresten Claus Frimann var fødd her i 1746. På klosterøya Selja, som i stor grad høyrde til prestegarden, vart målaren Bernt Tunold fødd i 1877. Boka fortel også om tettstadutviklinga i Selje sidan sentrum ligg på prestegardens grunn. Det handlar også om jordbruksdrifta i tidlegare tider, om den særmerkte prestegardshagen frå 1700-talet, og om skogplantinga på Ersholmen på 1870-talet. Og om forfattar, nobelprisvinnar og katolikk Sigrid Undset som forgjeves prøvde å kjøpe seg tomt på Selja i 1920-åra, for å kome så nær den heilage Sankta Sunniva som råd. Boka inngår i ein serie på fem bøker om historisk viktige prestegardar som Opplysningsvesenets fond har ansvar for. Dei andre prestegardane i serien er Lesja (Oppland), Nesset (Møre og Romsdal), Meldal (Sør-Trøndelag) og Verdal (Nord-Trøndelag).
