Fraktfritt ved kjøp for minst kr 398,-   Sjå vilkår

Den store brannen i Lærdal har sjølvsagt fått ein stor plass i boka. Det same har oktoberflaumen som gjorde skader for hundrevis av millionar kroner kringom i fylket.

Men vi syner ikkje berre fram sogningen og fjordingen sin kamp mot naturkrefter og katastrofar. Du vil sjølvsagt finne mange saker frå eit mindre dramatisk daglegliv. Nokre med smil og glede, andre med ei tåre i augekroken.

Kultur og sport har også i år fått sin fortente plass i boka. Fylket hadde med fem utøvarar i dei store idrettsfestane i russiske Sotsji. Har du gløymt korleis det gjekk, kan kanskje Årboka fungere som ei minnebok.

Kvar handlar vi mest, korleis reiser vi, kva vin drikk vi, kvar er det billegast å kjøpe hus og hytte, kva kommune har dei flinkaste elevane og kva slags hundar held vi oss med? Dette er berre nokre av spørsmåla den fyldige statistikkdelen kan gje svar på. Med andre ord faktaopplysningar om eitt og hitt om fylket slik det er i dag, og var i går.

Boka har eit namneregister med nær 1000 namn.